Flickr
Posted On Monday, November 24, 2008 at by Unknown
This is a test post from 
, a fancy photo sharing thing.
ဒီစစ်တပ်ကို ဖြုတ်ချစို့လား....
Posted On Monday, February 18, 2008 at by Unknown
လူထုဆန္ဒခံယူပွဲ လုပ်တော့မယ်..........
သြော်....... လွန်ခဲ့တဲ့ ၁၈ နှစ်တုန်းက ကျွန်တော် အသက် ၁၁ နှစ်။ အိမ်နားက မဲရုံ တစ်ခုကို တစ်မိသားစုလုံးသွားကြ။ ထောက်ခံမဲ ကို ကြက်ခြေခတ်ပြီး ပေးရမယ်တဲ့.....
“အမေ.. မဲပေးချင်တဲ့သူကို ကြက်ခြေခတ်ရမှာနော်”
ပြောသူက ဖေဖေ...
“အေးပါ... ငါသိပါတယ်”
ပြန်ဖြေလိုက်သူက ကျွန်တော့် အဘွား
တက်ကြွတဲ့ ချေလှမ်းတွေနဲ့ ရှေ့ရောက်နေတာက ကျွန်တော့် အမေ....
ဘာကိုလိုချင်နေမှန်း သေချာမသိပေမယ့် လွတ်လပ်စွာ ဆိုတဲ့ စကားလုံးနဲ့ ရေးသားခွင့်၊ ပြောဆိုခွင့်၊ တွေးခေါ်ခွင့် ဆိုတာတွေကို တွဲစပ်ပြီး အဓ္ဓိပါယ် နားလည်တတ်နေပြီ ဖြစ်တဲ့ ကျွန်တော်။ အ၀တ်အစား လှတ ပတ ၀တ်ပြီး ဘာမှန်းမသိဘဲ ပျော်ရွှင်နေတဲ့ ကျွန်တော့် ညီမ၊ ကျွန်တော်တို့ မိသားစုရဲ့ တိုးတိတ် ငြိမ်းချမ်းစွာ ပျော်ရွှင်မှုတွေကတော့ ဒေါ်အောင်ဆန်းစုကြည် ဆိုတဲ့ အမည်ရယ်၊ ခမေါက် အမှတ်တံဆိပ်ရယ် ငါတို့မြန်မာတွေ လွတ်လပ်တော့မယ်ဆိုတဲ့ အတွေးတွေရယ် ပေါင်းစပ်ပြီး တက်ကြွ၊ ရွှင်လန်းနေပါတယ်။
ဖေဖေ တို့ တစ်လှည့်စီ မဲသွားထည့်ကြ အိမ်အပြန်ခရီးမှာတော့ ဖေဖေက
“အမေ.. ဘယ်သူ့ကို မဲထည့်လိုက်လဲ”
“ဟဲ့ ... ဗိုလ်ချုပ်သမီး ပေါ့ဟဲ့”
“ကျွန်တော်က အမေမှားထည့်မိမှာ စိုးလို့ပါ”
“အေးပါ... ငါသိပါတယ်”
ညနေဘက် မဲ ရုံမှာ မဲ ကြေညာတော့
တ.ဆ.ည “...”
တသီးပုဂလ္လ “...”
အမျိုးသား ဒီမိုကရေစီ အဖွဲ့ချုပ် “..”
ဟေး...... ဆူညံလိုက်တဲ့ အသံတွေဆိုတာ တစ်ရပ်ကွက်လုံး ပေါက်ထွက်မတတ်...
အမျိုးသား ဒီမိုကရေစီ အဖွဲ့ချုပ် မှ ထောက်ခံမဲ “...” နဲ့ အနိုင်ရပါသည် ဆိုတဲ့ အသံကိုတောင် သေသေချာချာ မကြားရလောက်အောင် ဖုံးလွှမ်းနေပါတော့တယ်။ ကျွန်တော်တို့အားလုံးရဲ့ ရင်ထဲမှာ အမျိုးအမည် မဖော်ပြတတ်တဲ့ ၀မ်းသာမှု ပျော်ရွှင်မှု တွေဟာ ထိမ်းသိမ်း မရနိုင်လောက်အောင် တစ်လောကလုံး အပျော်တွေနဲ့ ပြည့်နေပါတယ်။ ပေးခဲ့ရတဲ့ အသက်တွေအတွက် လေးစားစွာ ကြည်ညိုမှု ဦးဆောင် တိုက်ပွဲဝင်ခဲ့တဲ့ ကျောင်းသားများကို အားကျမှု ကျေးဇူးတင်မှု တွေဟာ လူတိုင်းရင်မှာ ပြည့်နှက်နေခဲ့ပါတယ်။
နေရာတိုင်းမှာ ပျော်ရွှင်မှုတွေနဲ့ ပြည့်နေပါတယ်... စစ်တပ်တွေပဲ ရှိတယ်ဆိုတဲ့ နေရာတွေမှာလဲ အမျိုးသား ဒီမိုကရေစီ အဖွဲ့ချုပ်ရဲ့ အောင်မြင်မှုတွေဟာ ကြောက်ခမန်းလိလိ.... အပြတ်အသတ် နိုင်ပါတယ် ဆိုတဲ့ သတင်းတွေက နေရာအနှံ့ .....
ဒါတွေကို ဖျက်ဆီးပစ်သူတွေက ယောက်ျားစကား မပြောတဲ့ ယောက်ျားကောင်းဆိုတဲ့ စစ်တပ်။ စစ်တန်းလျားကနေ ဘယ်ကဘယ်လို ရာဇ ပလ္လင်ဖြစ်သွားမှန်းမသိ.... အနိုင်ရပါတီကို အာဏာလွှဲမပေး... ဟိုဟာလုပ်မယ်၊ ဒီဟာလုပ်မယ်။ အမျိုးသားဒီမိုကရေစီ အဖွဲ့ချုပ်က လွှတ်တော် ကိုယ်စားလှယ်တွေကို အမှုဆင် ဖမ်းဆီး။ အကွက်ချ ဖမ်းဆီး။ ဘာမှကို အကြောင်းမပြဘဲ ဖမ်းဆီး။ ကျွန်တော်တို့ ပြည်သူတွေက ကြည့်နေရတယ် ဘာမှ မလုပ်နိုင်ခဲ့ဘူး....
ကျွန်တော်တို့ ခင်ဗျားတို့ လူတိုင်းလိုလို ကျောင်းသားဘ၀ကို ဖြတ်သန်းလာတာပါ...
ခင်ဗျားလဲ ကျောင်းသားပါ ကျွန်တော်လဲ ကျောင်းသားပါ
ကျောင်းသူတွေဆိုတာ ကျွန်တော်တို့ရဲ့ ညီမတွေ၊ အမတွေ၊ သူငယ်ချင်းတွေပါ
လူထုဆိုတာ ကျွန်တော်တို့ ခင်ဗျားတို့ရဲ့ မိဘတွေ ဆွေမျိုးတွေပါ
ရဟန်း သံဃာဆိုတာ ကျွန်တော်တို့ ခင်ဗျားတို့ရဲ့ ခိုကိုးရာ တွေပါ
ခင်ဗျားတို့ ကျွန်တော်တို့ ကျောင်းသားတွေကို သတ်...
ကျွန်တော်တို့ရဲ့ ညီမတွေ အမတွေ ကို အဓမ္မကျင့်၊ သတ်...
ကျွန်တော်တို့ ခင်ဗျားတို့ရဲ့ မိသားစုတွေကို တကွဲ တပြားဖြစ်အောင်လုပ်...
ဒုက္ခတွေ ဝေနေအောင်လုပ်....
ကျွန်တော်တို့ ခင်ဗျားတို့ ကိုးကွယ်တဲ့ သံဃာကိုသတ်....
တစ်နိုင်ငံ လုံးကို အကွက်ချ ဖျက်ဆီးပြီးတဲ့နောက်မှာ နော်တစ်ခေါက် ပြောပြန်တာက
“လူထု ဆန္ဒခံယူပွဲ လုပ်မယ်တဲ့” .......... စဉ်းစားကြပါဦးဗျာ..........
ကျွန်တော်တို့ ဘယ်နှစ်ခါ ပြောရဦးမှာလဲ.. ဘယ်နှစ်ခါပြရဦးမှာလဲ.. ကျွန်တော်တို့ရဲ့ ဆန္ဒတွေကို
ဆန္ဒတွေ ပြလွန်းလို့လဲ ရင်ဘတ်မှာ အပေါက်တွေ အထပ်ထပ်ဖြစ်နေပြီ
ညစ်တတ်တဲ့၊ ညစ်ပတ်တဲ့
ကတိမတည်တဲ့..
ဒီ အမျိုးကောင်းသားဆိုတဲ့ စစ်တပ်နဲ့တော့
ကျွန်တော်တို့ရဲ့ ဆန္ဒတွေကို ပြရင်းနဲ့ပဲ
လုံးပါး ပါးတော့ မှာပဲ ထင်တယ်...
မနိုင်မချင်း ခေါင်းပန်းလှန်ချင်နေတဲ့သူတွေ
မနိုင်မချင်း ခြေထောက်ထိုးခံ ချင်တဲ့သူတွေ.
မနိုင်မချင်း ထပ်လျှောက်ပါဦးလို့ ပြောတတ်တဲ့သူတွေ
ကဲဗျာ..
ခင်ဗျားလဲ ယောက်ျား ကျွန်တော်လဲ ယောက်ျား
ခင်ဗျားလဲ ဗမာပြည်သား ကျုပ်လဲ ဗမာပြည်သား
ကျုပ်တို့တွေ ဒီအတိုင်းကြည့်နေလို့ကတော့
မြန်မာပြည် ကျွန်ဘ၀က လွတ်မှာမဟုတ်ဘူး
ထမင်းတနပ် စားနေရရင် ပြီးကြကြေးလား
ခင်ဗျား ဗမာပြည်သား မဟုတ်ဘူးလား
ဗမာပြည်ဆိုတာ ဘုရားပေါ် ဘိနပ်စီး အတက်ခံတဲ့ သူတွေ မဟုတ်ဘူး
နေမ၀င် အင်ပါယာ ဆိုတာကြီးတောင် လွတ်လပ်ရေး ပေးပါတော့မယ်လို့ ပြောခဲ့ရတာ
နေမျိုးနွယ်တွေလဲ အကုန်ပြေးခဲ့ကြရတာ
ဆရာကြီး သခင်ကိုယ်တော်မှိုင်း၊ ဗိုလ်ချုပ်အောင်ဆန်း
ရေတွက်လို့ မရနိုင်လောက်အောင် ပညာရှိ သူရဲကောင်းတွေ ပေါ်ပေါက်ခဲ့တာ
အနုပညာ၊ ယဉ်ကျေးမှုမှာ အရှေ့တောင် အာရှ မပြောနဲ့ တကမ္ဘာလုံးနဲ့ ရင်ဘောင်တန်းနိုင်တာ
ကဲ ဒီ စစ်တပ် မလောက်လေး မလောက်စားကို ကြောက်များနေသလား ကိုယ့်လူ
ကဲ ဗျာ စကားတွေ အသာထားပြီး ဒီစစ်တပ်ကို ဖြုတ်ချလိုက်စို့လား
Blog ဆက်ရေးနေပါဦးမည်
Posted On Monday, January 28, 2008 at by Unknown
တခြားလူများ Blog ရေးကြသည်မှာ မည်သည် အခက်အခဲများ ကြုံတွေ့ကြသည်ကိုတော့မသိ။ ကျွန်တော် တွင်တော့ တော်တော်ခက်နေသည်။ ကျွန်တော့်တွင် သူငယ်ချင်းတစ်ယောက်ရှိ၏။ ထိုသူငယ်ချင်းမှာ အလွန်တော်သော သူတစ်ယောက် ဖြစ်သည်။ ကျွန်တော်ထက် အသက်အတန် ငယ်သော်လည်း သူ၏ အတတ်ပညာကြောင့် ကျွန်တော် လေးလေးစားစားပင် ဆက်ဆံပါ၏။ Blog ရေးခါစ ကျွန်တော်သည် သူနှင့် ပါတ်သက်သည့် အကြောင်းအရာတစ်ခုကို Blog ပေါ်တွင် ရေးသားလိုက်မိပါသည်။
ထိုနောက် ကျွန်တော်၏ Blog သို့လာကြည့်ကြရန် သူငယ်ချင်းများအားလုံးကို Email ပို့လိုက်ပါသည်။ နောက်တစ်နေ့တွင်ပင် သူနှင့် ကျွန်တော် တခြားကိစ္စတစ်ခုနှင့် ပါတ်သက်၍ စကားများကာ ကျွန်တော်နှင့် သူငယ်ချင်း(မိတ်ဆွေ) အဖြစ်မှ ပြတ်စဲသွားလေသည်။ ကျွန်တော် တော်တော် စိတ်မကောင်းပါ။ ကျွန်တော်၏ အကျင့်တစ်ခုက တော်သောသူ၊ Logic ကောင်းသောသူဆိုလျှင် တော်တော်ခင်တွယ် တတ်သည်။ အဆက်အသွယ်လည်း မပြတ်လိုပါ။ အလွန်တရာ သဘောကျတတ်၏။ ထိုသို့ ခင်မင်သည်နှင့် အမျှ ကျွန်တော် နက်နက် ရှိုင်းရှိုင်း ခံစားရသည်။ ကျွန်တော် စိတ်ထဲတွင် တော်တော်လေး အဆင်မပြေ ဖြစ်သွား၏။ ကိုယ် ရေးထားသော အကြောင်းအရာကို လူအများရှေ့ ချပြရာတွင် တော်တော် ကြောက်ဖို့ကောင်းပါလား ဆိုသော အသိတရား ရလိုက်သည်။
ထိုအခါ ကျွန်တော် ရေးချင်သလို၊ စိတ်ကူးရှိသလို ရေးလိုက်မိသောကြောင့် အဆင်မပြေမှုကို ခံစားရသည် ဟု ကောက်ချက် ချမိသည်။ ထိုအခါ ကျွန်တော်ရေးလိုသော အကြောင်းအရာကို ကျွန်တော်ရေးချင်သလို မှ ရေးခွင့် မရပါလျှင် မည်သည့်အတွက်ကြောင့် Blog ရမည်နည်း ဟု စဉ်းစားမိလာသည်။ သို့နှင့် ပင် ကျွန်တော် Blog နှင့် တော်တော်လေးကို အဆက်ပြတ်သွားသည်။
နောက်နောင်တော့ သတိထားရပေတော့မည်။ စကားမကျွံအောင်၊ နှုတ်မလွန်အောင် ခါးသီးသောအတွေ့အကြုံ သင်ခန်းစာကို သူငယ်ချင်းတစ်ယောက် ရင်းနှီးပြီးမှ ရသော အတွေ့အကြုံမှာ အတော်တန်ဖိုးရှိပေသည်။ ထိုအတွေးနှင့် တစ်ပြိုင်နက်တည်း ရရှိလိုက်သော ခံယူချက်မှာ Blog ရေးသူသည် စဉ်းစားချင့်ချိန် ရုံမျှမက သတ္တိလည်း ရှိဖို့လိုသည်ဆိုသော ကိစ္စဖြစ်ပေသည်။ မိမိပြောလို သော အကြောင်းအရာနှင့် စေတနာ မှန်လျှင်မူ ဆုံးရှုံးမှုများကို ခံနိုင်ရည်ရှိရပေလိမ့်မည်။
ဘာပဲဖြစ်ဖြစ်ပေါ့လေ ကျွန်တော် Blog ဆက်ရေးနေပါဦးမည်။ မည်သူမျှ မဖတ်လျှင်လည်း ဆက်ရေးနေပါဦးမည်။ ပြဿနာများ တက်လျှင်လည်း ဆက်ရေးနေပါဦးမည်။ ဆုံးရှုံးမှုများရှိလျှင်လည်း ဆက်ရေးနေပါဦးမည်။ တစ်ယောက်မျှ မကြိုက်ကြလျှင်လည်း ဆက်ရေးနေပါဦးမည်။
ဟုတ်ကဲ့ပါ..... Blog ဆက်ရေးနေပါဦးမည်။
မင်းငယ်ပါသေးတယ်..
Posted On at by Unknown
ကျွန်တော် မြန်မာနိုင်ငံတွင် နေစဉ်က အထက်ပါစကားမျိုးကို အကြိမ်ကြိမ် ကြားရပေ သည်။ ကြင်နာသယောင်ဖြင့် နှိမ်ချသော စကားဟု ခံစားရသည်။ လူတစ်ယောက်၏ စကား တစ်ခွန်းကို အလေးထားသင့် မထားသင့်ဆိုသည်ကို သူတင်ပြသောအကြောင်းအရာ၊ အချက်အလက်၊ မျှတမှုတို့နှင့် မဆုံးဖြတ်ပဲ ထိုသူ၏ အသက်အရွယ်နှင့် ဆုံးဖြတ်သင့် သလား စဉ်းစား စရာပင် ဖြစ်သည်။ ကျွန်တော်တို့ နိုင်ငံတွင် လူငယ်တစ်ယောက် က ကိစ္စတစ်ခုကို ၀င်ရောက်ဆွေးနွေး လိုလျှင် မင်း ငယ်ပါသေးတယ် ဆိုသည်နှင့် မင်းကများ ကြီးကြီး ကျယ်ကျယ် ဆိုသည့် စကားနှစ် လုံးကြားထဲတွင်ပင် နစ်မြုပ်နေရပေသည်။
ထိုစကား နှစ်လုံး၏ စုပေါင်း အဓိပါယ်မှာ အသက်အရွယ် မပြည့်သေးလျှင် ကြီးကြီးကျယ် ကျယ် မလုပ်ရ မပြောရ ဆိုသော အဓ္ဓိပါယ်နှင့် တူတူပင်ဖြစ်သည်။ ထိုအခါ တိုင်းပြည်ပျက်လေ သည်။ ကျွန်တော်လူကြီးများကို စော်ကားလိုသော စိတ်ကူးမရှိပါ။ သို့သော် ယခုအချိန်တွင် ကျွန်တော်တို့ တိုင်းပြည်သည် အကြောင်းအမျိုးမျိုးအောက်တွင် ကျဆုံးလျက် ရှိနေရာ အဓိက ကျသော အချက်များထဲတွင် ထိုအချက်လည်းပါဝင်ပေသည်။ လူငယ်များ Hip Hop သီချင်း သီဆိုသောအခါ၊ အ၀တ်အစား ကြောင်ကြောင်ကျားကျား ၀တ်ဆင်သည့်အခါ မြန်မာနိုင်ငံကြီး၊ ယဉ်ကျေးမှုကြီး ပျက်စီးမတတ် ပြောဆို တတ်သလောက်။ လူကြီးများ လာဘ်စားသည့်အခါ၊ ကိုယ်ကျင့်တရားမကောင်းသောအခါတွင်တော့ ပါးစပ် ပိတ်နေတတ်လေသည်။ အဘယ်ကြောင့်ဆိုသော် မပြောရဲသောကြောင့် ဖြစ်သည်။ ပြတ်ပြတ် သားသား ပြောရမည်ဆိုပါက ကျွန်တော်တို့၏ ရှေ့မှ လူကြီးများ တာဝန်မကျေပါ။
သို့သော်လည်း ယနေ့တိုင် ညီလေးမင်းငယ်ပါသေးတယ်။ ညီမလေး မင်းငယ်ပါသေး တယ်။ မင်းမသိပဲ လျောက်မလုပ်ပါနဲ့ ငါတို့အစီအစဉ်တွေ ပျက်ကုန်လိမ့်မယ်။ (တကယ်ကတော့ ပျက်သွားလဲ အေးတာပါပဲ။ အချိန်ကုန်ရုံက လွဲပြီးအောင်မှ မအောင်မြင်တာ)။ ဆိုသော စကားများနှင့်သာ လုံးလည် ချာလည် လိုက်နေကြသည်။ ပြောကြပေဦးမည် လူငယ်တွေက အသုံးမှ မကျတာ။ ကျွန်တော်လဲ ပြန်ပြောပါဦးမည် အသုံးကျအောင်မှ မလုပ်ပေးကြတာ။
ကျွန်တော် စင်္ကာပူကို ရောက်လာပါသည်။ သူရို့ တိုင်းပြည် တိုးတက်နေပါသည်။ လူအများ စည်းကမ်းရှိနေကြပါသည်။ သေသေချာချာ လေ့လာကြည့်ပါက ခလေးတစ်ယောက် ဟာ အကြောက်ကလေးတော့ ရှိမှ ဆိုသော စကားမျိုး တစ်ခါမျှ မကြားဖူးပါ။ ခလေးတစ်ယောက် ကို တုတ်နှင့် ရိုက်ဆုံးမသည်ကို လည်း တစ်ခါမျှ မမြင်ဖူးပါ။ ကျွန်တော်များ မှားနေလားတော့ မသိ။ လူများသည် အသိစိတ်ဓါတ်နှင့် နေထိုင်ကြသည် အသိစိတ်ဓါတ်ကို တိုးတက်လာအောင် စာအုပ် စာပေ တို့နှင့် ပြုပြင်ပေးကြသည်။ အကြောက်တရားနှင့် မပြုပြင်ကြပါ။ ထိုသို့ အကြောက် တရားနှင့် မပြုပြင်သော တိုင်းပြည်များ တိုးတက်ပြီး အကြောက်တရား လက်ကိုင် ထားသော ကျွန်တော်တို့ နိုင်ငံ တရုတ်ကျွန်ဖြစ်နေရပေသည်။
ထိုအကျင့်ကြီးကို ကျွန်တော်တို့ ဆုပ်ကိုင်ဦးမည်ဆိုပါက နောက်ထပ် အလွဲကြီး လွဲကြပေဦးမည်။ ထိုအကြောင်းများကြောင့် ကျွန်တော်တို့ လူကြီးပေါက်စ (အသက်ကြီး လာသည်ကို ဆိုလိုပါသည်) များသည် ကျွန်တော်တို့ အလှည့်တွင် တာဝန်ကျေအောင် လုပ်ပြီး ကျွန်တော်တို့၏ နောက်မျိုးဆက်သစ်များကို အကြောက်တရားဖြင့် မဟုတ်ပဲ ဆင်ခြင်တုံ တရားဖြင့် ဘ၀ကို တည်ထောင်နိုင်ရန် စောင့်ရှောက်သင့်ကြောင်း တိုက်တွန်းလိုက်ရပေသည်။
